心底話 + 祈禱 (1-10)

心底話 + 祈禱：

‍

#1 心底話

#羨慕#自卑#比較#渴望得到肯定

‍

埋藏心裡的說話：

唔知點解，我覺得自己樣樣都不如人，身邊的舊同學，畢業後好快找到工作。我做左幾份工，都係合約，幾勤力都無得轉長工。唉！我好似覺得樣樣都不如人。無論樣貌、外表、身材、學歷，甚至見工，我都表現得平平無奇。我對自己無晒信心。

仲有，我成日覺得同D同事溝通有困難，我唔明佢地做緊咩，成日都過晒deadline才交report比我，攪到我要成日同佢地執手尾，做埋佢地個份。

我好似睇唔到自己有的咩好過人地，好多時比較之下，我更加覺得自卑，我都好想好似佢地一樣，升職加人工，被人讚一句都好呀!

‍

‍

#1 祈禱

‍

‍

祈禱：

慈愛的天父，我時時都羨慕人地，總覺得人地有的，都比我好，我只看到自己的不足，覺得自己無人地咁順利，無人地咁好，我感覺到好自卑，我唔知點做好呀!

天父，如果天地都是由你創造的，請給我相信：主你創造的都是美好的，包括我！你做我係好的！

你比我的經歷，全都係想要塑造我，成為獨特的我。我相信主你賜比我的都是祝福，讓我知道不須要同其他人比較。求你打開我的眼睛，看到你塑造我的心意；打開我的心，感受到你是深愛我的。在你的愛裡，我感受到自己是多麼寶貴的，我相信每天都是主你為我所預備的。

以上禱告是奉主耶穌基督的名祈求，阿們。

‍

‍

#2 心底話

#寂寞#孤單#無朋友

‍

‍

埋藏心裡的說話：

唔知點解，我好多時覺得同朋友玩完，返到屋企冷清清，一個人就覺得自己怪怪地，就有好多野諗，越諗越唔開心。有時人多的地方，反而唔想去，因為散場的感覺唔好受。我其實係教會都做好多服事，但係同組員都係吹下水，唔敢同佢地講我D野。我要係人面前裝扮得好好地，傷心的事都唔會同佢地講，點解…講左又點呀…失見證喎！牧師會點睇我…我唔敢諗，個心好難過。我只好自己同自己講，無事呀！但我終於要承認，我好寂寞！

‍

‍

#2 祈禱

‍

‍

祈禱：

慈愛的天父，

我一直以來都害怕同人交心，深怕被人拒絕，也怕人知道我的脆弱。我好想祈求主，比一些能夠與我同行的弟兄姊妹，可以接納我、聆聽我而不批判我。我求主讓我感受到你的愛，賜比我內心有安全感，使我不害怕，有勇氣嘗試打開自己的心，與人建立信任的關係。愛我的主，求你的愛充滿我，使我感受到被愛，使我可以關心身邊的家人和弟兄姊妹，重新連結在你的愛裡。

以上禱告是奉主耶穌基督的名祈求，阿們！

‍

‍

‍

#3 心底話

#懷疑人生#擔心#不知如何選擇工作#混亂#遠離神#無信心

‍

‍

埋藏心裡的說話：

我一直以來覺得人生沒有方向，不斷問神我可以做D咩，我擔心做錯選擇，所以我一直都為著工作禱告，求神比一份好的工作給我，希望工作環境，人事會有改變。但是我漸漸害怕再去問，擔心自己無能力做得到，或者我根本唔會做得好。我害怕世俗的眼光，但又唔知怎樣活出基督徒的生命。我好似只顧自己的事情，唔似其他的基督徒做得咁好。我內心好多矛盾，覺得做基督徒好多限制，總是覺得在人眼中對基督徒都有很高的期望。我無信心點樣學像基督，點樣才能活出基督的生命呢？

‍

‍

#3 祈禱

‍

‍

祈禱：

親愛的天父，我一直都唔知點樣選擇工作，怕做錯決定。我以前試過猜想神你對我的計劃，但我又怕估錯，內心有不安、混亂和矛盾。我現在知道，原來神你早已為我的人生編排了最美好的事情，縱然我未完全看到，但你樂意逐步讓我知道，就算我跟不到你的計劃，你也會處處提示我，為我包底，我感受到你對我的愛，是毫無保留。神呀！我想做一個你想我成為的人，求你賜我勇氣和有冒險的精神，按照我對生活的認知和身邊人的須要，活出神你所喜悅的生命。我真是好感激神你對我的慷慨、寬容和恩慈。賜比我更豐富的生命和恩典，我想做一個自由、喜樂和天父喜愛的孩子，讓我每一天活出基督的愛，感謝主你聽我的禱告。奉主耶穌基督的名祈求，阿們！

‍

‍

‍

#4 心底話

#父母關係惡劣#不被愛#溝通困難#渴望愛#接納#我是誰#失落

‍

埋藏心裡的說話：

我唔明自己的父母點解咁固執，我想佢地鬧小D，比D關心我，唔好成日咁囉嗦。我講佢地又唔明，成日以為佢地講的道理至有用，而家呢個社會是行唔通啦！

我大左之後，同父母的溝通越來越少，覺得同佢地好陌生，我點努力都改變唔到佢地對我嘅想法。其實我內心好難過，我知道佢地養大我，但係佢地唔識得關心我，在我眼中，佢地好多時都偏心，講一套做一套，我有需要時都無理過我。我曾經懷疑過他們唔係我的親生父母，總之，我唔覺得父母錫我囉!

‍

‍

#4 祈禱

‍

‍

祈禱：

親愛的天父，我不明白自己的父母點解咁樣對待我。我無論點做，他們都好似唔滿意我。主啊！你最明白我，你愛我係無條件的，求你打開我的心，接受你的愛，接受你給我兒女的名份。你是我天上的父母，你愛我，比地上的父母更多、更親密和更理解我。

你話過你永遠不會離棄我，在你的愛中，我可以安心地成長。我知道你接納我的不足，就算我做錯，你都不會批評我，話我無用。每當我覺得失落，求天父讓我感受到你的安慰、支持和鼓勵。天父，多謝你一直疼愛我。我感激你不離不棄的愛，看待我為你的寶貝孩子。我永遠都是你的寶貝，生活在你的愛中。

奉主耶穌基督的名祈求，阿們！

‍

‍

‍

#5 心底話

#不完美#失眠#耗盡#做得唔夠好

‍

‍

埋藏心裡的說話：

我會諗到好多問題，但係唔想同人傾我的諗法，我一直自己埋頭工作，我想做好D，想完美D，內心的諗法好似迫到自己抖唔到氣。同事之間都唔理解我。我無要求佢地做，只係自己要求自己做好D。我內向的性格更加唔知點表達，我越做越覺得無力。我瞓得好少，時常失眠，我一合埋眼就諗工作，我只係想盡力做好D工作，唔想令人失望。

‍

‍

#5 祈禱

‍

‍

祈禱：

親愛的天父，我近來拼命工作，瞓得好少，時常失眠，所以好辛苦。我知道自己不完美，所以我一直努力去做好自己的本份，盡力去做好我的工作，但真係身體和心靈都有耗盡的感覺，無力再做下去。

主呀！多謝你接納我這個唔完美的人。原來，當我真心真意承認自己是唔完美時，我反而覺得輕鬆多了。我唔需要再活係別人的期望中，只需要在主耶穌基督的愛中生活。主，你知道我已經盡自己的力量去做，請幫助我：不再被「要做到最好」的魔咒綁住、我可以自在地真心活出自己、我可以接納自己的唔完美、我可以停下來多一點親近主你，因為無論我係點，工作成績如何，主你都接納我，一個真正的我。

奉主耶穌基督的名祈求，阿們！

‍

‍

‍

#6 心底話

#無夢想#躺平#生活無意義#無目標#自卑

‍

‍

埋藏心裡的說話：

我一直覺得在而家呢個社會生活無咩意義，係而家經濟低迷的時候，我見到社會基層家庭都生活得非常困苦。我想很多人和我一樣唔想無意義地生活，但對將來無希望，不敢有夢想，只能躺平下來，過得一天又一天，帶著沒有靈魂的軀殼去生活。

‍

‍

#6 祈禱

‍

‍

祈禱：

親愛的天父，我覺得近來生活無意義，我唔再敢去諗什麼理想，我只是一天過一天，躺平生活，無朋友圈，好似連做人的尊嚴都慢慢消失。

主啊，求你賜比我有信心去面對未來，燃點我心中的希望，比我的人生感受到有意義。

主啊! 我知道你的恩典夠我用，你激勵我，讓我知道在而家呢個時候、呢個社會出生，也不是偶然，而是有目的存在。面對殘酷的現實，求主比我仍然有希望，保持理想，不致退縮、絕望。相信神比我有足夠能力，使我更積極去生活。有神的愛，我知道我可以活得有尊嚴和有意義。

主啊！你是愛，你愛我，比我有意義的人生。我願意與人分享你的愛，與身邊的人彼此守望扶持，活出有意義的每一天。

奉主耶穌基督的名祈求，阿們！

‍

‍

‍

#7 心底話

#痛苦#發脾氣#憤怒#尋求公義

‍

‍

埋藏心裡的說話：

我心一直好痛，我好想害我的人，都感受到我的痛苦。點解佢地可以好快活，但我就跌落地獄一樣，自己承受一切。佢地係壞人，自己做的事不負責任，後果都由我來承受。我是否要同佢地一樣做壞人，才能脫離痛苦… ？我係受害者，有無人可以幫我？我好憤怒，但心又驚，唔敢同人講。邊個會明白我…？

‍

‍

#7 祈禱

‍

祈禱：

親愛的天父，我心一直好痛，我好想害我的人，都受到同樣的痛苦。你應許惡人必遭惡報，他們所做的壞事必害死自己。天父，你的救恩必然臨到投靠你的人。你必救我脫離壞人的掌控。我痛苦、恐懼，但我不一定要做壞人。求天父教我安全地釋放我的負能量，我須要保守自己的心靈，不再被壞人傷害。慈愛的主，求你安慰我，醫治我破碎的心，陪伴我渡過困難，保護我，使我不再驚慌。讓我在你的愛裡，感受到平靜和安全。

奉主耶穌基督的名祈求，阿們！

‍

‍

‍

#8 心底話

#虛假#遠離神#不知#混亂#無幸福感#懷疑人生#妒忌

‍

‍

埋藏心裡的說話：

我見到好多人在臉書上生活多采多姿，成日post食物相，又周圍去旅行，chill幸福咁，佢地點解有咁多時間、錢、仲有咁多朋友，可以唔駛做，又食又玩，真是令人羨慕。我覺得佢地好假，成個月都post生日相呃like，扮晒好幸福甘…？

點解我的生活無好似佢地咁多姿多采，我覺得自己相對好無用，無幸福感，好唔自在，真是好妒忌佢地。

‍

‍

#8 祈禱

‍

‍

祈禱：

親愛的天父，好多人在臉書上生活多采多姿，我都想好似佢地一樣，滿有幸福的生活。

但我不要虛假的境像，我想真的生活得開心。我希望能將放鬆和真開心的一面和別人分享。

天父，你知道我一直努力去生活，面對很多困難和艱辛，求你幫助我生活取得平衡。辛苦時，重覆回顧你在我生命的恩典，留意在每個人生階段，你都陪伴我左右，無離棄我。感謝主，每次我回看自己臉書的相片，都為自己加力，為自己加like。因為無論我生活如何，感恩有你與我同在。

奉主耶穌基督的名祈求，阿們！

‍

‍

‍

#9 心底話

#被誤解#想放棄#混亂#很累#收埋自己#朋友關係

‍

‍

埋藏心裡的說話：

我有時不想說話，是太累了。我嘗試去讓人明白我，以前若有人誤會了自己，我總想解釋和澄清。現在我唔想再講啦，特別是對方已有前設和立場，講什麼都無用，因為對方只想守護自己的想法；當我感受到被人誤解，甚至覺得不被尊重，都唔想再澄清。再講下去，大家關係更加惡化。既然我講什麼，你都是聽唔明，我要慳啲力氣，唔使再講啦!

‍

‍

#9 祈禱

‍

‍

祈禱：

親愛的天父，我一直總想有人明白自己，但我很怕被人誤會，我不斷解釋和澄清，對方都是不理解。我最擔心是關係惡化，所以我寧願唔出聲，強忍下來。慈愛的天父，你是最明白和了解我的，我的心意都是為大家好。我感謝主你給我時間，去消化、梳理和整合。求天父比我有等待對方的心。我明白與其惡化關係，不如順其自然。這也是善待自己和為自己負責的最好選擇。

在天父的懷抱中，我知道不解釋也沒關係，不說話都沒有關係，讓我安穩在你的愛中，因為你最明白和了解我。

奉主耶穌基督的名祈求，阿們！

‍

‍

#10 心底話

#怒火沖天#憤怒#避風港#家庭暴力#離家

‍

‍

埋藏心裡的說話：

我很怕見到他發嬲，他一發脾氣，我就好驚，好害怕。他罵人只有他的道理，他將怒氣全向我爆發。我感受這種暴力越來越大，我不知點樣回應，無力保護自己和家人。我覺得驚慌、害怕和不安全，我只好靜靜地離開。我想離開這個永無寧日的家，走到一個安靜的避風港！

‍

‍

#10 祈禱

‍

‍

祈禱：

親愛的天父，我生活在一個像有計時炸彈的屋企，家人的脾氣隨時會爆發，令我心慌害怕，甚至有時內心覺得很絕望，很想逃避離開這個家。天父，你提醒我不要關上心門，因為總有出路在附近。我不要再做受害者，求天父給我勇氣和自信，別人對我的攻擊，我要拒絕接收。我相信上帝是公義，各人最終都要向上帝交帳。求天父每天加力給我，使我有平靜的心去面對。讓我倚靠著你，對未來仍心存盼望。祈求天父的愛圍繞我，使我不再害怕，陪伴我，給我有盼望，渡過每一天。

奉主耶穌基督的名祈求，阿們！

‍